Онлайн
Երբ իրավիճակը կայունանա, զինծառայողները սահմանված կարգով կստանան պարտադիր արձակուրդը: Այս մասին ֆեյսբուքյան իր էջում գրել է ՀՀ պաշտպանության նախարարության (ՊՆ) խոսնակ Շուշան Ստեփանյանը:
«Զինվորական ծառայության և զինծառայողի կարգավիճակի մասին օրենքով ժամկետային զինծառայողները հերթական մեկ արձակուրդի հնարավորություն ունեն՝ ուսումնական փուլից հետո։ Մնացած բոլոր արձակուրդները խրախուսանք են և տրվում են որպես լրացուցիչ արձակուրդ։ Երբ իրավիճակը կայունանա, զինծառայողները սահմանված կարգով կստանան պարտադիր արձակուրդը»,-նշել է Ստեփանյանը՝ հավելելով, որ զինծառայողներին հանձնարարված է բացառել շփումները քաղաքացիական ազգաբնակչության հետ ու մասնակցությունը մասսայական միջոցառումներին՝ խնջույքներ, տոնակատարություններ, թաղման արարողություններ և այլն, զերծ մնալ համաճարակային տեսանկյունից ՀՀ ռիսկային տարածքների քաղաքացիների, ինչպես նաև ռիսկային երկրներից վերադարձած անձանց հետ շփումներից:
Հիշեցնենք՝ կորոնավիրուսի ներթափանցումը զորամասեր կանխելու նպատակով այցերը, զինվորների արձակուրդներն ու ազատ արձակումներն արգելված են փետրվարի 25-ից, երբ երկրում դեռ վիրուսով վարակվածության որևէ ախտորոշված դեպք արձանագրված չէր:
Կորոնավիրուսի առաջին դեպքը հաստատվել է մարտի 1-ին է, նշյալ հիվանդն արդեն առողջացած դուրս է գրվել հիվանդանոցից:
